【研習回饋】教育影展—56種喝采 學員心得回饋之三
●文/張燕玲(旗山國小退休教師)
【編按】高教產舉辦二場教育影展，希望能激勵教育夥伴，謝謝燕玲老師用本土語寫下用心的心得回饋，與你分享。
一間教室就是一个現實社會的縮影，毋過徛佇教育的立場，咱希望為未來的社會創造閣較濟的溫暖和體諒，這是融合教育想欲達成的目標之一：予特殊生會當佮一般的學生做伙學習、互相理解、互相適應，因為未來的社會有你嘛有我。藉著教室--社會的縮影，先進行一場的教育，來學習欲按怎來互相對待，尊重彼此的人權。
佇教師節的跤步欲來進前，高雄市教育產業工會辦這場電影欣賞的研習，毋但予參與的老師會當了解著自閉症的學生的特質，嘛會當做伙討論教育現場本身拄著的問題佮解決策略，誠實是真好的教師節禮物。
主角傑森的爸母佇伊細漢的時陣就發現伊佮一般的囡仔無仝款，嘛決定欲接受這个事實，好好仔面對未來的困境。
爸母接納伊的無仝，走揣協助佮支持，會使講是好運的開頭。雖然自閉症的症頭予伊食袂少苦，像講同學的袂理解來欺負；老師感覺無受著尊重、教學受著質疑、失去節奏；甚至是伊家己嘛感覺心內定咧戰爭，因為代誌無法度攏總符合伊家己所定的規則，這種種的衝突攏予伊足無法度忍受的。佳哉in 爸母完全的支持佮幫助，予伊會當度過足濟難關，親像事先預想會拄著的狀況佮應對方式，閣有建立保護泡仔，減少伊和別人身軀接觸的無爽快，這真正的是有足大的幫贊的。
毋過，看這支片了後，我嘛有足濟疑問，像講伊雖然無愛予人磕著，毋過卻是主動要求顧口的檢查；閣有，為著欲去看比賽，會當答應in老爸佇學校好好仔上課莫惹代誌，這敢毋是表示若伊願意，是有才調去控制家己的，問題只是伊本身的意願而已。
若誠實是按呢，自閉症患者自我的堅持，要求別人一定愛容忍和配合（像要求公車站座位仝款）到底敢無一寡成份可能是除了自閉症無法度控制的症頭以外的自我和自私咧？
毋管按怎講，自閉症的人嘛是愛過團體生活，佇一个團體內底用自閉症的症頭來要求其他的人一定愛包容佮配合，敢無可能嘛是造成團體其他的成員愛承擔壓力和損失著人權（佇無威脅的環境予人公平對待的權利）？
而且，佇教育現場定聽講家長為著驚囡仔予人點油做記號，無願意講家己囡仔的狀況予同學知影，行政人員配合隱私權的保護啥物攏毋敢講，這敢會予融合教育的好意攏無去咧？
我認為融合教育共逐家合做伙是欲增加互相了解學會曉尊重，若按呢，敢毋是愛以專業的角度兼顧雙方的人權來做適時、適當的教育，增加對應的知識佮能力，若按呢嘛才才調真正對治療異數行向接納多元！